Поглед:
661
Русија ги прогласи за „неприфатливи“ и персона нон грата 14 вработени во бугарската амбасада во Москва и конзуларните служби на Бугарија. Ова се случи откако шефот на дипломатска мисија Атанас Крастин беше повикан во руското МНР каде му беше врачена нота.
Подоцна бугарското МНР прецизираше дека станува збор за четворица бугарски дипломати и десет технички вработени од дипломатските претставништва во Москва, Санкт Петербург и Екатеринбург, како и од Индустрискиот центар на Република Бугарија во Москва. Тие треба да ја напуштат земјата во рок од 120 часа.
Во соопштението на руското МНР се објаснува дека ова е одмаздничка мерка на бугарските одлуки за протерување на 70 вработени во руските институции, за воведување квоти за дипломатски и административно-технички персонал на Русија во Бугарија и за привремено затворање на Генералниот конзулат во Русе.
„Сакаме да нагласиме дека одговорноста за последиците од овие контрапродуктивни чекори е целосно на владата на Кирил Петков“, додаваат од руското министерство.
„Убедени сме дека непријателските дејствија кон Русија немаат никаква врска со националните интереси на Бугарија и нејзиниот народ“, вели Москва во својот карактеристичен пристап да тврди дека владетелите и оние што ги избрале во Бугарија имаат совршено различно разбирање. Се повторува и тезата дека бугарските дејствија се во служба на „колективниот запад“ и заслужуваат „жалење“:
„Сметаме дека ваквите постапки не само што предизвикуваат значителна штета на традиционалните врски меѓу нашите земји, ги кршат правата на сонародниците кои го изгубиле пристапот до конзуларните услуги, туку сведочат и за понатамошната деградација на колективниот Запад, кој е подготвен да ги жртвува интересите на партнерите само да и наштетат на Русија. Жално е безусловното придржување на официјална Софија кон оваа деструктивна линија“.
Затворањето на Генералниот конзулат во Русе е дел од одлуките на бугарското МНР за ограничување на бугарското конзуларно присуство во Русија со привремено затворање на Генералниот конзулат во Екатеринбург.
Можностите на руските граѓани да патуваат во Бугарија се значително намалени по воведувањето на санкциите на ЕУ поради руската агресија врз Украина. Руски авиони не се дозволени во воздушниот простор на земјите-членки, а нивните пристаништа подоцна беа затворени за руски бродови, со некои исклучоци за испорака на товар.
Претседателот Владимир Путин ги вклучи сите земји од ЕУ на списокот на „непријателски земји“ за кои станува многу потешко или невозможно да се ангажираат руски државјани да им помагаат на нивните конзуларни и дипломатски претставништва, процедурата за забрзано издавање визи за граѓаните на овие 27 земји беше укината, вклучително и Бугарија.
Стана посложено одржувањето на бизнисот, бидејќи плаќањата мора да се вршат само во рубли и секоја трансакција ја одобрува специјална владина комисија.
