Нашата држава заедно со другите држави од Западен Балкан се наоѓа на клучна точка на одлучување и фундаментална структурна промена во врска со претстојната зелена транзиција, а државите стануваат посвесни за неопходноста и придобивките од транзицијата кон чиста енергија.
Ова денеска го истакна министерот за животна средина и просторно планирање Насер Нуредини на панелот на Европската банка за обнова и развој „Изгледи за чиста енергија за Балканот и Источна Европа“ организирана во рамки на Регионалната конференцијата за перспектива за чиста енергија во Истанбул во организација на Атлантскиот совет во Турција и Глобалниот енергетски центар на Советот, а во партнерство со Европската банка за обнова и развој.
Нуредини, како што соошти МЖСПП, нагласил дека зголемувањето на употребата на обновлива енергија ќе овозможи да се исполнат климатските цели, да се подобри енергетската безбедност и да се намалат трошоците за електрична енергија за потрошувачите.
Министерот Нуредини се осврна на трасираните национални политикити за енергетска транзиција кон користење на обновливи извори на енергија, на зацртаните амбициозни климатски цели за декарбонизација, како и на предизвиците за обезбедување на финансии за нивна реализација, особено во услови на глобална енергетска криза. Истакна дека по Глазгов, на владино ниво е усвоен многу важен плански документ – национален интегриран план за енергија и клима. Со ова, заедно со нашата Долгорочна стратегија за климатска акција и националната енергетска стратегија, се поставија јасни долгорочни и среднорочни цели за постигнување на декарбонизиран развој и раст на кој се гледа како на можност и за социјален раст.
Конференцијата овозможи владини претставници, претставници на деловните и научните заедници да разговараат за чисти, безбедни и одржливи енергетски политики.
