Поглед:
22
Притисокот врз Србија расте затоа што сите сакаат крај на косовската сага, изјави српскиот претседател Александар Вучиќ, истакнувајќи дека не се бираат средства за да се постигне тоа. Вучиќ изјави и дека не е исклучено да се повлече од функцијата за да „купи“ шест до девет месеци време за Србија, пишува N1.
Вучиќ за ТВ Прва изјави дека во разговорот со американскиот државен секретар Ентони Блинкен дознал дека за рок од неколку недели треба да се реши косовското прашање, но смета дека тоа е нереално.
„Гледам вечерва дека петорката на НАТО побараа итен прием и претпоставувам дека ќе ми наложат се што најави албанскиот весник дека треба да се направи до 24 февруари следната година, па се чини дека ќе бараат решение по секоја цена“, рече Вучиќ.
Вучиќ изјави дека Србија се соочува со двоен притисок во однос на санкциите кон Русија и решението за Косово и Метохија.
„Чекам да видам утре што ќе ми достави петорката на НАТО, објавија дека имаат нешто и затоа брзаа. Само се надевам дека не е текстот од „Албаниан пост“, изјави Вучиќ.
„Европа ни треба од милион причини, поради фабрики, вредности, правила и правда, но на сите отворено им кажувам дека не може секогаш земја и народ да бидат жртва за некој да ја оправда нивната лоша политика и газење на меѓународниот правен поредок“, рече Вучиќ.
Запрашан за шпекулациите дека би можел да се повлече од претседателската функција, Вучиќ рече дека може да го стори тоа како „тактички потег“ за да ја спаси својата земја и да „купи“ време од шест до девет месеци.
Вучиќ рече дека човек кој е на политичката арена мора секој ден да размислува за оставка и дека таква опција мора да постои во тактиката на државниот интерес.
